Mae diogelu’r amgylchedd a lleihau allyriadau carbon sy’n gysylltiedig â’r ffyrdd cefnffyrdd yn flaenoriaeth nid yn unig i NMWTRA, ond i les Cymru gyfan. Mae ardaloedd sylweddol o dir (Yr Ystâd Feddal) sy’n gysylltiedig â’n Rhwydwaith Ffyrdd Strategol sy’n gweithredu fel “coridorau gwyrdd” ac sy’n cynnwys amrywiaeth eang o gynefinoedd sy’n cynnal bioamrywiaeth helaeth o fywyd gwyllt, ac sydd hefyd yn amsugno carbon.

Mae tîm Amgylchedd a Newid Hinsawdd NMWTRA yn rheoli’r ardaloedd hyn i’w cynnal a’u gwella, tra’n sicrhau dyletswydd Llywodraeth Cymru i weithredu’r ddeddfwriaeth a’r polisïau sydd eu hangen i yrru’r newidiadau hanfodol i fynd i’r afael â’r argyfyngau hinsawdd a natur ar y cyd ac i ddiogelu ein natur ar gyfer cenedlaethau’r dyfodol. Fel Asiantaeth, rydym yn gweithio gyda’n gilydd i gydnabod ac i chwarae rhan mewn diogelu’r amgylchedd, lleihau allyriadau carbon a helpu natur i wella.

Mae NMWTRA wedi gweithredu dull cynhwysfawr o ymdrin ag effaith newid hinsawdd. Mae’r tîm Amgylchedd a Newid Hinsawdd hefyd yn cefnogi’r Asiantaeth i fynd i’r afael ag effaith newid hinsawdd ac yn parhau i ddangos hyn drwy welliannau i reoli lleihau allyriadau carbon, atafaelu carbon a gwydnwch i newid hinsawdd; er enghraifft, drwy ddatblygu a gweithredu strategaeth newid hinsawdd y sefydliad, sy’n nodi rhaglen ehangach o flaenoriaethau a phrosiectau sy’n cyd-fynd â Llywodraeth Cymru, gan gynnwys defnydd tir cynaliadwy, caffael amgylcheddol gynaliadwy, a diogelu a gwella bioamrywiaeth.